SAKATA LA TAZARA

Wafanyakazi Tazara ‘kucheka’ leo.

Mamlaka ya Reli ya Tanzania na Zambia (Tazara) imesalimu amri na kukubali kuwalipa malimbikizo ya mishahara wafanyakazi wake baada ya kuendesha mgomo wa siku saba.

Uamuzi huo umefikiwa baada ya Tazara kukaa na uongozi wa wafanyakazi hao na kukubaliana kuwalipa malimbikizo hayo kuanzia leo.

Kaimu Mkurugenzi Mkuu wa Tazara, Ronald Phiri alisema jana kuwa, Tazara imesitisha uamuzi wa kuwafukuza baada ya kukubaliana kulipa malimbikizo hayo.

Alisema kutokana na hali hiyo, hakuna mfanyakazi aliyepewa barua ya kufukuzwa na kwamba Tazara iko tayari kuwalipa haki zao.

Alisema, kama kuna mfanyakazi atagoma kutekeleza makubaliano hayo, atajifukuzisha mwenyewe kwa sababu, uongozi wa Tazara kwa upande wa Tanzania pamoja na ule wa Zambia, walikubaliana kwa pamoja kuwalipa wafanyakazi hao na kusitisha zoezi la kuwapa barua za kuwaachisha kazi.

“Wafanyakazi wote wanaombwa kurudi kazini ifikapo kesho asubuhi (leo), kila mmoja anatakiwa kuripoti sehemu yake ya kazi na endapo mtu atakataa kufika, atahesabiwa kuwa amejifukuzisha kazi mwenyewe,” aliongeza.

Alisema mpaka sasa bado wanaendelea na mazungumzo yanayolenga kutafuta suluhu kati yao pamoja na matatizo yanayoikabili mamlaka hiyo.

Alifafanua mpaka sasa nchi hizo,zimechangia fedha kwa ajili ya kuwalipa wafanyakazi wake, na kwamba kama kuna mapungufu wataongeza fedha nyingine.

Alisema mpaka sasa, mgomo huo umesababisha hasara kwa serikali ya Tanzania pamoja na Zambia kwa kushindwa kufanya safari katika kipindi hicho.

Alibainisha kuwa kutokana na hali hiyo,wateja wao wameshindwa kufanya safari zao kwa kutumia usafiri huo katika kipindi hicho jambo ambalo limesababisha usumbufu.

Alifafanua kuwa, kutokana na hali hiyo, wanaamini kuwa, ikiwa wafanyakazi hao watatii amri hiyo ya kurudi kazini, hali ya usafiri itarudi kama zamani.

Chanzo :- Mwananchi