KAMPUNI YA KENYA KUILIPA TANZANIA BILIONI 16.

SERIKALI ya Kenya, imeamuriwa kuilipa Tanzania Sh bilioni 16, baada ya Kampuni ya Ujenzi ya Kundan Singh ya nchini humo iliyopewa kazi ya kujenga barabara hapa nchini, kuijenga kwa kiwango kisichoridhisha. Akizungumza na MTANZANIA juzi, Msemaji wa Wizara ya Ujenzi, Martin Ntemo, alisema kampuni hiyo ilipewa kazi ya kujenga barabara kuanzia Mbeya Mjini hadi Lwanjilo kwa kiwango cha lami, lakini ilishindwa kutimiza masharti ya mkataba unavyoelekeza.

Alisema kwamba, baada ya Serikali ya Tanzania kuchachamaa, kampuni hiyo ilikimbilia mahakamani kudai haki.

Ntemo ambaye alikuwa mkoani Mbeya na Waziri wa wizara hiyo, Dk. John Magufuli, alisema baada ya kampuni hiyo kukimbilia mahakamani, kesi ilisikilizwa na mwishowe ikaamuliwa kuilipa Tanzania kiasi hicho cha fedha.

“Mwaka 2007, kampuni hiyo iliingia mkataba, lakini ilipofika mwaka 2009, mkandarasi huyo alishindwa kukamilisha na kukimbilia mahakamani baada ya Serikali kuja juu.

“Lakini tunashukuru mahakama imetoa hukumu kwa kuitaka kampuni hiyo kuilipa Tanzania fedha hizo na hapa tunasubiria malipo hayo, lakini wakati mvutano ukiendelea, tulikuwa tukitafuta kampuni nyingine ya kujenga barabara hiyo,” alisema Ntemo.

Kwa mujibu wa Ntemo, wakati wa ziara hiyo, Dk. Magufuli aliwaeleza wananchi wa maeneo husika, kwamba ujenzi wa sehemu ya pili ya mradi huo ambayo inaanzia eneo la Lwanjilo hadi Chunya, itajengwa na Kampuni ya CCCC ya nchini China.

Alisema kampuni hiyo inapaswa kukabidhi barabara hiyo ifikapo Aprili mwaka 2014 kwa mujibu wa mkataba.

Alisema barabara hiyo itajengwa kwa gharama ya Sh bilioni 40.2 na kwamba kukamilika kwa ujenzi huo kutaondoa usumbufu wa barabara uliokuwa ukiwakumba wananchi wanaosafiri kati ya Mbeya na Chunya.

Pia alisema Dk. Magufuli alikuwa akiwasisitiza wananchi waliojenga nyumba zao kwenye hifadhi za barabara, wazibomoe haraka ili kupisha ujenzi huo.

Chanzo:- Mtanzania