KATIBU Mkuu wa Chama Cha Mapinduzi (CCM), Abdulrahma Kinana, amemshukia mbunge wa Musoma Mjini Vicent Nyerere (Chadema), kwa kumtaka kushughulikia kero za wapiga kura kuliko kuongoza maandamano. Amesema tangu mbunge huyo alipochaguliwa kuliongoza jimbo hilo amekuwa hatoi taarifa za maendeleo aliyoyasimamia na badala yake amekuwa akidandia hoja za utekelezaji wa Ilani ya CCM na kusema za chama chake.
Kinana alikuwa akituhubia mamia ya wananchi wa Manispaa ya Musoma katika mkutano wa hadhara.
Alisema kazi kubwa inayofanywa na CCM ni kuhakikisha inawahudumia wananchi bila kujali wanaongozwa na mbunge kutoka chama gani.
Kinana alishangazwa na hatua ya Nyerere kutamba mbele ya wananchi akisema mradi wa maji wa Bukanga ulitokana na ahadi yake wakati CCM iliahidi mradi huo katika ilani yake mwaka 2005.
“CCM kazi yetu ni kutoa huduma kwa wananchi kwao wao ndio tulioingia nao mkataba wa kuliongoza taifa hili na ni wajibu wetu kuwahudumia bila kujali kuwa mnaongozwa na mbunge kutoka chama gani.
“Asije hapa mbele za watu kusema kuwa amefanya yeye ila anatakiwa kuja nanyi mmuhoji maswali juu ya ahadi zake za kuifanya Musoma mjini kuwa ya maziwa na asali kuliko kusema tofauti na hali ya mambo,” alisema Kinana.
Wakati huohuo Vicent Nyerere amesema Kinana hana budi kutafakari kabla ya kutoa kauli zake akiwa kama katibu mkuu wa Chama kinachotawala.
Vicent alikuwa akihutubia maelfu ya wananchi na wafuasi wa Chadema katika viwanja vya shule ya sekondari Mara mjini Musoma.
Chanzo:- Mtanzania.
No comments:
Post a Comment