KATIBU Mkuu wa Chama Cha Mapinduzi (CCM), Abdulrahman Kinana, ameiteka miji ya Shirati na Musoma huku akiwataka wanachama wa CCM kuwa wakali kwa viongozi wa Serikali waweze kutimiza wajibu wao. Amesema ikiwa watashindwa kufanya hivyo kuna hatari ya watanzania kuambiwa maneno ya uongo na wapinzani hali itakayokiweka chama hicho katika wakati mgumu.
Kauli hiyo aliitoa jana alipohutubia mamia ya wananchi wa mji wa Musoma ambako aliwaumbua wapinzani kwa kuwataka kutojinasibu kutokana na utekelezaji wa miradi iliyoahidiwa na ilani ya uchaguzi ya CCM.
Aliwaonya viongozi wa CCM kuwa wakali katika utekelezaji wa ilani ya chama hicho kwa kuibana Serikali vinginevyo itakuwa ni hatari kwao na itakuwa imekula kwao.
Kinana alisema hivi sasa kuna kundi kubwa la watu kutoka vyama vya upinzani wanaozunguka wakisema maneno ya uongo hali ambayo kama wabunge na viongozi wa chama hicho wasipokuwa wakali watapoteza imani kwa Watanzania.
Alitoa mfano wa mradi mkubwa wa maji ya Ziwa Victoria unaoendelea kujengwa mjini Musoma, alisema pamoja na wapinzani kudai ni wao, ukweli ni kwamba mradi huo ni ahadi ya CCM na sasa inautekeleza kwa vitendo.
Kwa upande wake Katibu wa Halmashauri Kuu, Itikadi na Uenezi, Nape Nnauye, aliwataka wananchi wa Musoma kutogombanishwa na wanasiasa kwa madai ya Katiba Mpya.
Katika hatua nyingine Chama Cha Mapinduzi (CCM) kimesema kuwa kushindwa kwa jimbo la Musoma Mjini katika Uchaguzi Mkuu uliopita kulitokana na usaliti uliofanywa na baadhi ya wanachama wake, wakiwamo viongozi.
Kinana aliwasili mjini Musoma saa 4 asubuhi akitokea wilayani Rorya akiwakwa kutumia kivuko cha MV Musoma na baada ya kufika alilakiwa na mamia ya wananchi walijitokeza kumlaki.
Chanzo:- Mtanzania.
No comments:
Post a Comment