KUNDI LA AL-SHABAAB NI NANI HASA?

KUNDI la wapiganaji wa Kisomali la Al-Shabaab, limevamia jumba la kifahari lenye maduka na migahawa nchini Kenya. Kundi la Al Shabaab lenye mizizi yake nchini Somalia, limeweza kuota miji mikubwa ya Somalia, ikiwemo Mogadishu, Kisumayi na sehemu nyingine. Jina Al-Shabaab, linamaanisha kijana kwa lugha ya Kiarabu.

Kundi hilo liliibuka kama tawi la vijana la Umoja wa Mahakama za Kiislamu, ambao baadaye ulivunjika mwaka 2006, wakati lilipopigana na wanajeshi wa Ethiopia waliokuwa wameingia nchini Somalia kuunga mkono Serikali iliyokuwa dhaifu. Kwa kipindi kirefu, kumekuwa na taarifa nyingi kuhusu wapiganaji wa Kiislamu wanaokwenda Somalia kupigania Al Shabaab.

Kundi hilo, limeweka sheria kali za Kiislamu katika maeneo ambayo linadhibiti ikiwemo kupigwa kwa mawe hadi kufa wanawake wanaodaiwa kufanya uasherati pamoja na kuwakata mikono wezi.

Ingawa kundi hilo limepoteza udhibiti wa miji mikubwa, bado limejikita mizizi katika maeneo ya vijijini.

Lililazimika kuondoka katika mji mkuu Mogadishu, Agosti mwaka 2011 na pia kuondoka katika mji wa bandarini wa Kismayo, Septemba mwaka 2012.

Kismayo, ulikuwa mji muhimu kwa kundi hilo, ambao ulikuwa unawezesha bidhaa kuwafikia wapiganaji wa kundi hilo pamoja na kuwatoza watu ushuru kwa shughuli zao.

Umoja wa Afrika (AU), ambao unaunga mkono juhudi za majeshi ya Serikali, ulisherehekea ushindi huo kwa kuwapunguza nguvu, ingawa Al-Shabaab bado hufanya mashambulizi ya mara kwa mara ya kujitoa mhanga mjini Mogadishu na kwingineko.

Wadadisi wanaamini Al-Shabaab, limeanza kufanya mashambulizi ya kuvizia baada ya kushindwa na majeshi ya AU wanaotumia nguvu dhidi yao.

Lakini linakabiliwa na tishio kubwa zaidi kutoka kwa wanajeshi wa Kenya, walioanza harakati zao dhidi ya kundi hilo kuanzia mwaka 2011.

Kenya iliwatuhumu wapiganaji wa Al-Shabaab kwa kuwateka nyara wanajeshi wake pamoja na watalii na sasa wamekuwa katika mstari wa mbele kupambana na kundi hilo.

Nani kiongozi wa Al-Shabaab?

Ahmed Abdi Godane, ndiye kiongozi wa kundi hilo. Anajulikana kama Mukhtar Abu Zubair, anatoka katika Jimbo la Somaliland.

Kumekuwa na taarifa za mgawanyiko katika kundi hilo, ambazo hata hivyo zinapingwa vikali na kundi lenyewe.

Inaarifiwa uongozi wake unapingwa na wanachama wanaotoka maeneo ya kusini na ambao ni wengi katika kundi hilo. Inakisiwa idadi yao ni kati ya wapiganaji 7,000 na 9,000.

Godane huwa haonekani hadharani. Mtangulizi wake, Moalim Aden Hashi Ayro, aliuawa katika shambulizi lililofanywa na Marekani mwaka 2008.

Al-Shabaab lilijiunga na Al-Qaeda, Februari 2012. Katika ujumbe wa video, kiongozi wa Al-Shabab, Ahmed Abdi Godane alisema anaahidi kumuunga mkono kingozi wa Al-Qaeda, Ayman al-Zawahiri.

Makundi hayo mawili, yamekuwa yakifanya kazi kwa pamoja na raia wa kigeni wamekuwa wakiunga mkono kundi hilo na hata kuwasaidia katika harakati zao za mapigano.

Mwaka jana, maofisa wa Al-Shabaab waliambatana na mtu waliyesema ni mwanachama wa Al-Qaeda na kumtambua kuwa raia wa Marekani, Abu Abdulla Almuhajir, alipokuwa anatoa msaada wa chakula kwa waathiriwa wa njaa.

Maofisa nchini Marekani, wanaamini kuwa wapiganaji wa Al Qaeeda ambao hawahusiani na mashambulizi nchini Afghanistan na Pakistan, kufuatia mauaji ya kiongozi wao,Osama bin Laden, wapiganaji wake wengi wanakwenda kutafuta hifadhi nchini Somalia.

Chanzo Mtanzania.