MAALIM SEIF AZIDI KUIKOROGA KATIBA MPYA.

MAKAMU wa Kwanza wa Rais wa Serikali ya Umoja wa Kitaifa Zanzibar, Seif Sharrif Hamad amemsihi Rais Jakaya Kikwete kusoma alama za nyakati kabla ya kufanya uamuzi wa kusaini Muswada wa Marekebisho ya Sheria la Mabadiliko ya Katiba Mpya.

Akizungumza na Jumuiya ya Wazanzibar wanaoishi Tanzania Bara, Dar es Salaam juzi, alidai muswada huo ulipitishwa bungeni kwa nguvu bila kuwapo na maridhiano katika pande mbili za wananchi wa Watanzania na Wazanzibari.

Seif alisema muswada huo hauna nia njema kwa wananchi na ikiwa Rais Kikwete atausaini na kuwa sheria kamili, basi atambue anaongeza mgogoro ambao utachukua miaka mingi kupata suluhisho.

“Mchakato wa kupata Katiba Mpya ulianzishwa na Rais Kikwete na hili lazima tumpongeze kwa sababu katiba tunayoitumia hivi sasa ilipatikana kwa njia ambazo hazikuheshimiwa kitendo ambacho kimewafanya Watanzania hususan Wazanzibari kutokuwa na uhuru kamili.

“Pamoja na pongezi hizo lakini mchakato huu unaonekana kuleta ishara mbaya kutokana na kutekwa na Chama Cha Mapinduzi (CCM) kitendo ambacho kimeleta mvutano huku njama zikifanyika bungeni kwa kutumia wingi wa kura kuupitisha.

“Nasema nimezungumza na Wazanzibari wote na taasisi kadhaa wamesema hawaitambui rasimu hiyo kwa sababu haina maslahi kwao, pia wapo wabunge wa CCM wamenieleza kwamba walikazimishwa na viongozi wa chama kutetea rasimu hiyo.

“Sasa namsihi Rais wa Jamhuri ya Muungano wa Tanzania ambaye pia ni Rais wa Tanganyika kwamba afanye tathamini kwanza na kuwasikiliza wale wanaovutana au kulalamikia muswada huo kuepusha mgogoro.

“Hatutakubali kuburuzwa tena kwa sababu tumegundua hivi sasa kuna mapandikizi wameanza kupelekwa Zanzibar kutoka Bara na kupewa vitambulisho vya kura ili baadaye katika mchakato wa maoni ya kura wavitumie kukamilisha lengo lao.

“Hatukubali tena kuingizwa kwenye shimo ambalo tumedumu nalo kwa miaka 50, tumegundua njama zote za CCM, sasa tunataka Serikali tatu, tunataka Serikali yenye uwezo wa kuingia mikataba na mataifa mengine.

“Tunataka suala la uraia na uhamiaji lisiwe la muungano , tunataka mipaka ya Zanzibar ijulikane, kuwa na mabalozi nje ya nchi, utamaduni wetu utambulike, tunataka benki yetu itakuwa chini ya uangalizi wa Benki Kuu ya Tanzania.

“Na hili tunalisema kwa dhati kwamba Wazanzibari tutaidai Serikali yenye mamlaka kamili kwa gharama yoyote ile hadi ipatikane na kamwe hatakubali kuburuzwa na mchakato huu unalenga tena kuinyima fursa za kutambulika kimataifa,”alisema.

Seif alisema Wazanzibari hawatakubali tena viongozi wa Tanzania Bara kuendelea kunufaika na muungano wa nchi mbili nje ya nchi wakati Zanzibar ikitengwa zaidi ya miaka 50.

Alitoa historia ya Zanzibar kabla ya uhuru na baada ya uhuru kuonekana kwamba eneo kubwa la habari ya Hindi lipo Zanzibar na kuongeza kwamba kuwapo na Serikali tatu ndiyo suluhisho pekee.

“Uchumi wa Zanzibar na Tanganyika msingi wake ni rasilimali na msingi wa Zanzibar ni huduma inayotokana na visiwa vyake, sasa jambo la kusema kwamba tusiwe na mamlaka kamili kwa kisingizio cha usalama huo ni uzushi,’alisema.

Seif alisema ataendelea kuzungumza na Wazanzibari waliopo maeneo mbalimbali ndani na nje ya nchi kuwaelezea kinachoendelea Zanzibar na hatima yao.

Chanzo:- Mtanzania.