MFANYABIASHARA APIGWA MIAKA SABA KESI YA EPA.

MFANYABIASHARA Bahati Mahenge, Manase Mwakale na mkewe Edda Mwakale wamehukumiwa kwenda jela baada ya kupatikana na hatia katika kesi ya kuiba Sh bilioni 1.1 katika Akaunti ya Madeni ya Nje (EPA) zilizokuwapo Benki Kuu ya Tanzania (BoT). Mahenge anatakiwa kwenda jela miaka saba, Manase miaka mitano na mkewe Edda miezi 18. Washtakiwa hao walihukumiwa jana katika Mahakama ya Hakimu Mkazi Kisutu mbele ya jopo la mahakimu watatu, Sam Rumanyika, Lameck Mlacha na Sekela Mosha.

Akisoma hukumu hiyo, Mlacha alisema washtakiwa wanakabiliwa na mashtaka tisa ikiwamo kula njama, kughushi, kuiba Sh bilioni 1.1 BoT kwa udanganyifu baada ya kudai kwamba walinunua deni la Kampuni ya Japan ya Marubeni wakati haikuwa sahihi.

Alisema jopo liliangalia ushahidi wa pande zote mbili pamoja na majumuisho ambako upande wa mashtaka katika kosa la kwanza la kula njama waliweza kusaidia kujenga hoja kujua maana ya kosa hilo.

Alisema kwa ushahidi uliotolewa shtaka hilo limethibitishwa na Jamhuri bila kuacha shaka hivyo mshtakiwa Mahenge anatiwa hatiani na kwenda jela miaka saba.

Hata hivyo Hakimu Mlacha alisema mshtakiwa wa tatu, Davies Kamungu na Godfrey Mosha hakuna ushahidi uliowagusa hivyo mahakama inawaachia huru.

Mahakama hiyo ilitoa amri kwa mshtakiwa Mahenge na Manase kwamba wanatakiwa kurudisha fedha za BoT, Sh bilioni 1.1.

“Shtaka la nane la wizi wa Sh bilioni 1.1 na shtaka la tisa la kujipatia Sh milioni 100, mahakama inawaachia washtakiwa wote kwa sababu Jamhuri walitakiwa kuyafanyia marekebisho mashtaka hayo lakini hadi kesi inamalizika hayajawahi kufanyiwa marekebisho,” alisema Hakimu Mlacha.

Chanzo:- Mtanzania.