MSEMAJI WA AL-SHABAAB ATETEA SHAMBULIZI LA KENYA.

MSEMAJI wa Jeshi la Kikundi cha Kigaidi cha la Al Shabab Sheikh, Abdulaziz Abu Muscab, amejitokeza na kueleza sababu zilizosababisha kundi lake kuishambulia Kenya. Msemaji huyo, jana alihojiwa na Mwandishi wa Kituo cha Runinga cha Al Jazeera, Hamza Mohamed, alisema wamefikia hatua ya kuishambulia Kenya kutokana na uwamuzi wake wa kupeleka majeshi nchini Somalia kupambana na wana mgambo wao.

Alisema mbali ya kushambulia jengo la kitega uchumi la Westgate, kundi lake limekuwa na uhusiano na Kituo cha Vijana cha Mombasa ambacho Serikali ya Kenya, inasema ni kikundi cha ugaidi.

Mahojiano kati ya Muscab na Al Jazeera yalikuwa kama ifuatavyo.

SWALI: Hivi sasa ni zaidi ya miaka miwili tangu askari wa Kenya walipoingia Somalia kupambana na al-Shabab. Kwa nini muishambulie Nairobi wakati huu?

JIBU: Tumechelewa kuishambulia Nairobi. Hatukufanya hivyo mapema kwa sababu walikuwa wanatusubiri tuchukue hatua hiyo. Lengo letu kumshambulia adui wakati amejisahahu. Wakati huu walikuwa hawafikirii kama tungeshambulia. Tunachagua wakati gani na muda mzuri wa kushambulia.

SWALI: Hili ni shambulio la kwanza la al-Shabab mjini Nairobi?

JIBU: Hicho siyo kitu muhimu. Jambo muhimu ni kwamba ni sisi ndiyo tumefanya shambulio hilo wakati huu. Siyo muhimu kusema tumekwisha kushambulia kabla au hapana.

SWALI: Shambulio hili limefanywa kwenye duka kubwa la Westgate, ambalo wakati lilipofanywa, watu walikuwa wamejaa. Kwa nini al-Shabab inafanya mashambulio kwenye eneo lililojaa watu wasiokuwa na hatia?

JIBU: Eneo tuliloshambulia ni la duka kubwa la Westgate. Ni eneo ambalo watalii kutoka sehemu mbalimbali dunia hununua bidhaa zao, mahali ambako maofisa wa baliozi mbalimbali hutembelea.Ni eneo ambalo watendaji wakuu wa serikali ya Kenya huenda kwa ajili ya kupumzika na kustarehe. Westgate ni eneo ambalo kuna maduka ya Wayahudi na Wamarekani. Kwa maana hiyo tulipaswa tulishambulie eneo hilo.

Kuhusu vifo vya raia, Serikali ya Kenya haina budi iulizwe kwa nini askari wake walishambulia raia wa Somalia wasiokuwa na hatia katika makambi ya wakimbizi, kwa nini waliwashambulia kwa mabomu watu wasiokuwa na hatia katika maeneo ya Gedo na Jubba. Wanapaswa kuulizwa maswali hayo kwanza kabla ya kuulizwa sisi.

SWALI: Al-Shabab mnadai jukumu lenu ni kuwalinda Waislamu na hasa raia wa Somalia. Baadhi ya watu waliouawa katika shambulio wanadhihirisha vingine.

JIBU: Historia inaunga mkono madai yetu. Ni sisi tu ambao tunawalinda Wasomali na Somalia. Ni kikundi pekee kinachopigana dhidi ya maadui wa historia wa Somalia. Ni kikundi pekee ambacho kinaweza kusema “hapana” kwa maadui wa Somalia.

Kuhusu watu waliokufa, walikuwapo askari wa Kenya ambao walikuwa wakiwafyatulia risasi wapiganaji wetu. Kulikuwapo kurushiana risasi. Hakuna ushahidi kama ni risasi zetu ndizo zilizowaua watu hao.

Tuliwaondoa Waislamu wote tulipovamia duka hilo kubwa. Watu walioshuhudia tukio hilo wanatuunga mkono kuhusu hatua hiyo.

SWALI: Unafikiri shambulio hilo litaifanya Kenya iondoe askari wake Somalia?

JIBU: Hilo siyo swali la kujibiwa na sisi. Hilo ni swali la kujibiwa na serikali ya Kenya. Ni suala lao kuondoa askari wao au hapana. Kama hawatawaondoa, mashambulio kama hilo yatakuwa kitu cha kawaida nchini Kenya. Kuna uwezekano mkubwa kama hawataondoa askari wao Somalia, mashambulio kama hayo yatatokea katika miji ya Kenya kila siku.

SWALI: Kabla ya majeshi ya Kenya hajapelekwa Somalia Oktoba 2011,Al Shabab ilikuwa na uhusiano gani na serikali ya Kenya?

JIBU: Muda wote tulikuwa tunafahamu kwamba Kenya ni adui wa wananchi wa Somalia. Tulilifahamu hilo tulipokuwa tukiishikilia miji ya mpakani. Uvamizi wa Kenya nchini Somalia ni jambo ambalo lilitegemewa. Hatuwaamini na hatuna imani nao. 

SWALI: Kenya imesema itawasaka waliohusika na shambulo hilo na kwamba haiwezi kutulia hadi imewapata. Unasemaji kuhusu tamko hilo?

JIBU: Sisi siyo magaidi. Tunachofanya ni kujilinda na kutetea haki zetu na haki za wananchi wa Somalia.

Leo hi,i hakuna mtu mwenye rekodi mbaya ya uhalifu zaidi ya Rais Uhuru Kenyatta. Anazungumzia watu wachache waliokufa Westgate wakati yeye anahusika na vifo vya maelfu ya watu alipokuwa akigombea urais. Kama wananchi wa Kenya wanataka kumuadhibu mtu kwa uhalifu waanze naye.

Chanzo :- Mtanzania