RUTO, SANG WAKANA MASHITAKA ICC...

MAKAMU wa Rais wa Kenya, William Ruto amekana mashtaka aliyofunguliwa katika Mahakama ya Kimataifa ya Uhalifu (ICC), yenye makao yake Hague, nchini Uholanzi. Ruto anatuhumiwa kuchochea ghasia, mauaji na kuwalazimisha watu wahame kwao baada ya uchaguzi mkuu wa mwaka 2007 nchini Kenya.

Kwa mujibu wa Mwendesha Mashtaka Mkuu wa ICC, Fatou Bensouda, alisema, Ruto alichochea ghasia pamoja na kuwagawia silaha vijana ili wafanye uhalifu dhidi ya watu wa makabila mengine nchini humo.

Mchoro unaoonyesha jinsi Ruto alivyoshiriki kwenye matukio hayo ya uhalifu, ulionyeshwa jana mahakamani hapo.

Wakili, Steynberg wa upande wa mashtaka, aliiambia mahakama hiyo kuwa William Ruto, aliahidi kuwazawadia wale wote ambao wangefanya uhalifu katika mikutano iliyohudhuriwa na vijana ili wafanye vurugu, huku akigawa silaha za kutimiza azma hiyo katika Mkoa wa Rift Valley.

Wakili huyo alisema: “Kimsingi William Ruto na Joshua Arap Sang wanakabiliwa na makosa matatu; kuwalazimisha watu kuondoka makwao, mauaji na kuchochea ghasia.”

Hata hivyo, Ruto alikana kutenda makosa hayo na Mwendesha Mashtaka mkuu, Fatou Bensouda alisema: “Tunakabiliwa na wakati mgumu sana kukusanya ushahidi wa kesi ya Ruto, kutokana na mashahidi wengi kujitoa wakihofia maisha yao, lakini pia wengine imegundulika wamehongwa kutotoa ushahidi.”

Aliongeza kuwa, Ruto alichochea ghasia na mauaji kwa sababu za kisiasa, huku Sang akimsaidia kuchochea kupitia redio yake mara baada ya uchaguzi mkuu wa mwaka 2007-2008, hii ilieneza chuki za kikabila.”

Aidha, Sang pia amekanusha mashtaka yote dhidi yake na kusisitiza hahusiki na vurugu zilizotokea wakati huo. Katika hatua nyingine kesi ya mtuhumiwa mwingine, Uhuru Kenyatta inatarajiwa kunguruma mahakamani hapo ifikapo Septemba 20 mwaka huu.