WAZAMBIA WARIDHIKA NA BANDARI YA DAR, LAKINI WATOA ANGALIZO...

WAKATI nchi za Rwanda na Uganda zikiwa zimetangaza kuacha kutumia Bandari ya Dar es Salaam, hatua ambayo inadaiwa kuchochewa na mgogoro wa kidiplomasia, Kampuni ya Konkola ya Zambia, imesema itaendelea kutumia Bandari hiyo kusafirisha shaba inayozalishwa katika migodi yake, baada ya kuridhishwa na utendaji kazi wa Bandari hiyo.

Rwanda na Uganda zilitangaza kuacha kutumia Bandari ya Dar es Salaam kuanzia Septemba mosi mwaka huu, hatua ambayo ilitanguliwa na msuguano uliojitokeza baada ya Rais Jakaya Kikwete kumshauri Paul Kagame wa Rwanda kukaa meza moja ya mazungumzo na waasi wa FDLR.

Kwa mujibu wa taarifa iliyotolewa na Bandari ya Dar es Salaam, Mkuu wa Masoko na Usafirishaji wa kampuni hiyo kubwa katika uchimbaji wa shaba, Amol Mehra alithibitisha hilo kwa ujumbe wa Tanzania uliotembelea kampuni hiyo hivi karibuni.

Kampuni ya Konkola ambayo ni moja kati ya kampuni kubwa inayochimba shaba nchini Zambia, inasafirisha kiasi cha asilimia 70 ya shehena yake kupitia Bandari ya Dar es Salaam.

Mehra alisema hivi sasa kampuni hiyo pia imeanza kupitisha shehena inayoagiza kutoka nje kupitia Dar es Salaam, baada ya kuridhishwa na utendaji wake. 

Alisema pamoja na changamoto zilizopo katika njia ya barabara na reli, Kampuni ya Konkola imeridhishwa na uwezo na kasi ya kupakua mizigo katika Bandari ya Dar es Salaam. 

Uzalishaji shaba katika machimbo hayo unatarajiwa kuongezeka kutoka tani 200,000 kwa mwaka, zinazozalishwa sasa hadi tani 400,000 ambapo katika kipindi cha miaka mitatu ijayo, kampuni hiyo inatarajia kuzalisha tani milioni saba. 

Wakati huo huo, Kaimu Mwenyekiti wa Baraza la Wasafirishaji wa Zambia, Berry Mwango, alisema wasafirishaji wa Zambia wanapendelea kutumia Bandari ya Dar es Salaam kutokana na huduma bora, lakini akatoa wito kwa mamlaka husika kwa upande wa Tanzania kupunguza urasimu unaochangia kuchelewesha mizigo kufika Zambia kwa wakati.

Aliitaja Sheria ya Forodha inayoweka muda maalumu wa mizigo ya nchi jirani kufika mpakani, kuwa ni kikwazo na kwamba inahitaji kurejewa kwa kuwa imepitwa na wakati. 

“Sheria hizi ziliwekwa wakati barabara zilikuwa hazina msongamano uliopo hivi sasa, hivyo ilikuwa ni rahisi ila kwa sasa muda huo ni lazima uongezwe ili kutoa nafasi ya kutosha kukamilisha taratibu nyingine za forodha,” alisema. 

Alisema utaratibu huu unachangia kuleta msongamano katika mpaka wa Tunduma, kwa kuwa magari yanafika mpakani hapo yakiwa na nyaraka moja tu ya forodha ijulikanayo kama T1 ambayo haiyawezeshi kuvuka mpaka, hivyo kuwalazimu madereva kusubiri kwa muda wa siku zaidi ya tatu kwa nyaraka husika kupelekwa kutoka Dar es Salaam.

Mwango amesema bila kurahisisha huduma za forodha katika mpaka wa Tunduma na Nakonde, ucheleweshaji katika njia hiyo utaendelea na kushauri Serikali za pande zote mbili kuanzisha kituo cha pamoja cha forodha ili kuikabili hali hiyo.

Hivi karibuni, Ujumbe wa Tanzania ambao ulijumuisha Wizara ya Uchukuzi, Mamlaka ya Usimamizi wa Bandari Tanzania (TPA) na Kampuni ya Kitengo cha Makontena (TICTS), ulifanya ziara ya kimasoko kutembelea watumiaji wa Bandari ya Dar es Salaam.

Chanzo:- Mtanzania.