KOCHA wa Yanga, Ernie Brandts ameanzisha staili mpya ya mazoezi kwa ajili ya kuikabili Mbeya City na Prisons kwenye mechi mbili za Ligi Kuu Bara wikiendi ijayo.
Kwa mujibu wa Meneja wa Yanga, Hafidh Saleh timu hiyo itaondoka kesho Jumatano jijini Dar es Salaam kuelekea Mbeya ambako Jumamosi itashuka kwenye Uwanja wa Sokoine, Mbeya kuumana na Mbeya City na Jumatano ijayo itacheza na Prisons.
Yanga inafanya mazoezi yake kwenye Uwanja wa Shule ya Sekondari Loyola, Mabibo, Dar es Salaam ingawa kwa wiki iliyoanza jana Jumatatu, Mdachi huyo amebadilisha aina ya mazoezi yake.
Katika programu hiyo, Brandts anataka kila mchezaji kuwa na upeo wa kupiga pasi ndefu na kufungua vyumba kwa haraka.
Akizungumza na Mwanaspoti jana Jumatatu mara baada ya mazoezi hayo kumalizika kwenye Uwanja wa Loyola, Brandts alisema: “Aina ya mazoezi ambayo tunafanya ni kwa ajili ya kukabiliana na viwanja chakavu. Nafikiri tunatakiwa kucheza kwa pasi na kufungua vyumba haraka.
“Kucheza kwa pasi na kufungua vyumba itatusaidia pia kuepuka majeraha kwa vijana wangu. Nadhani mchezo uliopita tulikuwa na majeruhi zaidi ya watatu kikosi cha kwanza ingawa kwa sasa wote wamerejea,” alisema Brandts ambaye wachezaji wake sita waliokuwa Taifa Stars wataungana na wenzao leo Jumanne.
Nyota hao ni Nadir Haroub, David Luhende, Simon Msuva, Frank Domayo, Ally Mustapha ‘Barthez’ na Mrisho Ngassa ambaye hata hivyo amefungiwa mechi sita na Shirikisho la Soka Tanzania (TFF) kwa kusaini klabu mbili tofauti, Yanga na Simba ingawa ameidhinishwa kuichezea Yanga.
Chanzo:- Mwanaspot
No comments:
Post a Comment