Mafanikio hayo yalijulikana jana wakati Rais wa Chama cha Wafanyabiashara wa Madini ya Vito Thailand, Somchai Phornchindarak, kusema atafanya kila linalowezekana wafanyabiashara wenzake washiriki maonyesho ya madini ya vito yanayofanyika nchini Tanzania.
Phornchindarak alitoa kauli hiyo baada ya Masele kuwakabiribisha wafanyabiashara hao kushiriki maonyesho ya madini nchini Tanzania, kwa kuwa wao wana uzoefu katika sekta ya madini ya vito.
“Mwaliko wenu ni mzuri na nimeukubali na kufanikisha hilo nitawasiliana na wenzangu tuone namna ya kushiriki kadiri tutakavyoweza.
“Lakini kabla hatujaja, nawaomba mtuandikie taarifa ya maandishi mkitueleza namna maonyesho yenu yalivyo na pia mueleze kodi zinavyotozwa kwa wanunuzi wa madini pamoja na masuala ya usalama pindi tutakapokuwa huko,” alisema Phornchindarak.
Alisema kitendo cha wao kushiriki maonyesho hayo, kitakuwa ni kielelezo cha kuimarisha ushirikiano baina ya Tanzania na Thailand.
Alisema kuna haja kwa Serikali ya Tanzania kuondoa baadhi ya kodi zinazotozwa kwa wafanyabiashara wa madini hayo kwa kuwa utitiri wa kodi unawafanya wafanyabiashara wengi waendeshe biashara hiyo katika njia za panya.
Akizungumzia uamuzi huo, Masele, alisema umekuja wakati mwafaka kwa kuwa sekta ya madini nchini Tanzania itahitaji watu wenye uzoefu kama walivyo Wathailand ambao wamekuwa wakiandaa maonyesho ya madini hayo kwa miaka mingi sasa.
“Mwezi ujao sisi tuna maonyesho ya madini ya vito yatakayofanyika jijini Arusha, kwa hiyo kitendo cha nyinyi kukubali kushiriki wakati wowote mtakapopata nafasi, kitatupa uzoefu wa kutosha tutakaoupata kutoka kwenu ambao muda mrefu katika sekta hii,” alisema Masele.
Awali, Rais wa Chama cha Wafanyabiashara wa Madini Tanzania, Sammy Molel, alisema kuna kila sababu Serikali ya Tanzania kufanya kila linalowezekana kukabiliana na changamoto zinazoikabili sekta hiyo.
Chanzo:- Mtanzania.
No comments:
Post a Comment