NHC YAANZA KUUZA NYUMBA.

SHIRIKA la Nyumba la Taifa (NHC), limeanza kuuza nyumba za gharama nafuu kupitia kampeni ya ‘Nyumba yangu maisha yangu’ ambapo zaidi ya 5,000 zinatarajiwa kuuzwa nchi nzima.

Akizungumza na waandishi wa habari jijini Dar es Salaam jana, wakati wa kuzindua rasmi mauzo hayo, Mkurugenzi wa Maendeleo ya Biashara wa NHC, David Shambwe alisema wamezindua rasmi mauzo ya nyumba 406 katika mikoa 10 kati ya 11 ya mwanzo huku mauzo ya nyumba 220 zilizoko Kigamboni yakiwa yamekamilika.

Alisema watautekeleza kwa awamu kadhaa mpango wa shirika kujenga nyumba za gharama nafuu, uliozinduliwa rasmi na Rais Jakaya Kikwete, ambapo ya kwanza itatekelezwa katika mikoa 11 ikiwa na nyumba 606.

Shambwe aliongeza kuwa itakuwa imefikia mikoa yote Tanzania bara ifikapo mwishoni mwa mwaka 2015 kwa kila mkoa kuwa na takribani nyumba 200 za gharama nafuu.

Alisema mauzo yatafanyika kupitia namba ya akaunti maalumu huku akitaja orodha ya mabenki yanayotoa mikopo kwa wateja watakaonunua nyumba hizo kuwa ni Azania, Bank of Africa, Commercial Bank of Africa, Exim, KCB, NBC, NMB, Stanbic, Banc ABC, CRDB PLC, DCB na NIC Bank.

Chanzo:- Tanzania daima