WATANZANIA HATUSOMI, HATUDADISI.

Ijumaa iliyopita ilikuwa ni Siku ya Kusoma Vitabu.  Rais Mstaafu Benjamin Mkapa alikuwa mgeni rasmi pale nje ya Jengo la Maktaba Kuu siku hiyo ya maadhimisho.

 Bila shaka, Rais Mstaafu Benjamin Mkapa ni mmoja wa wapenzi wa kusoma vitabu na ni mfano wa kuigwa. Na huko nyuma nilipata  kusimulia kisa kifuatacho;

 Kwamba kuna  wakati mwandishi  mmoja wa Kitanzania   alipata kuambiwa na  Marehemu Profesa Chachage,  kuwa  tatizo kubwa la wanafunzi wake, yaani wanafunzi wa Chachage, ni kutopenda kujisomea.

Chachage alisema, kuwa  wanafunzi hao wakiwa chuoni, husoma kwa ajili ya kufanya mitihani ili wavuke kwenda mwaka unaofuata. Kwamba mtindo wao wa kusoma ni wa madesa(vitini) tu na siyo vitabu.

Kwa mujibu wa mwandishi huyo, Marehemu Chachage alilalamika kwamba wanafunzi walio wengi  hushindwa kupambanua  mambo kadhaa yanayowazunguka.

Ni dhahiri, kwa anayefuatilia jamii yetu kwa sasa, hatapata tabu sana kukubaliana na maelezo ya Marehemu Chachage kwa mwandishi huyo. Ni kweli kuwa Watanzania tulio wengi, na siyo wanafunzi pekee, tumepoteza utamaduni wa kusoma. Inafika mahala mwanafunzi au hata aliye nje ya shule, anaangalia kwanza ukubwa wa kitabu na wingi wa kurasa kabla ya kuamua kuazima au kununua kitabu, badala ya kuangalia maudhui ya kitabu husika. Imejitokeza hofu juu ya kurasa za kitabu, zisiwe nyingi sana, vinginevyo msomaji anatishika nacho.

Hakuna atakayebisha, kwamba nchi yetu haiwezi kupiga hatua zozote za maana kuelekea kwenye chochote kinachoitwa maendeleo kama watu wetu walio wengi hawatapenda kujisomea, kujiendeleza kimaarifa na hivyo basi, kujijengea uwezo wa kudadisi mambo.

Wengi tumekuwa wavivu wa kusoma. Leo ni kawaida kumkuta kijana aliyemaliza kidato cha nne hata cha sita bila hata kusoma maandiko yoyote yale ya Marehemu Shaaban Bin Robert kwa kutoa mfano wa mwandishi mmoja. Itawezekana vipi kijana wa Kitanzania amalize miaka 20 shuleni bila kusoma hata kurasa tatu tu za maandiko ya Shaaban Bin Robert achilia mbali waandishi wengine mahiri wa nchi hii?!

Hivi kijana huyu atajijua kweli kuwa yeye ni nani kwa maana ya utambulisho wake? Katika Kenya hakuna kijana anayemaliza miaka 20 shuleni bila kumsoma Ngugi Wa Thiong’o.

Nigeria hakuna kijana anayemaliza miaka 20 shuleni bila kumsoma Chinua Achebe au Wole Soyinka. Iweje katika nchi yetu vijana wamalize miaka 20  shuleni bila kusoma maandiko yaliyojaa hekima na yaliyosheheni utamaduni wetu kama yale ya Shaaban Bin Robert? Maandiko kama vile “ Adili Na Nduguze” , Kusadikika, Utu Bora Mkulima na mengineyo.

 Hadi hii leo, tunaamini, kuwa katika Afrika ya Mashariki nzima hajatokea mwandishi wa fasihi kwa Lugha ya Kiswahili mfano wa Shaaban Bin Robert.

Siyo ajabu, kuwa marehemu Shaaban Robert alitokea kuwa mwandishi mzuri. Shaaban Robert alikuwa ni msomaji mzuri wa vitabu vya hadithi, mashairi na maarifa mengine.

Chanzo:- Mwananchi