HADITHI: Missed call ya shemeji -22

Kanipigia sasa hivi, kasema amejua Feidha ni mimi, akanilaumu kwa nini namchukulia mume wake, wewe Beka. Da! Nimeumia sana darling ila nimejikaza tu. Yaani, nilipoona anazidi kuchanganya shutuma zake kwangu nikamkatia simu na kuizima kabisa.”

“Daa! Kweli kimenuka, sasa?” alihoji Beka kwa sauti ya kukatakata.
“Hata sijui mimi. Unajua alipokuja na kunitambua ni Ummy wakati anaondoka nikampa namba za simu ile nyingine maana aliniomba lakini mimi sikuchukua ya kwanza, alipopiga sikumjua ila sauti nikajua maana si nilitoka kuzungumza naye.”
“Kwani we uko wapi?”
“Nyumbani, njoo.”

“Mh! Kwani hukumwambia unaishi naye jirani?”
“Hilo sikumwambia na kama Mungu vile, unajua kabla mambo hayajaharibika tulikubaliana niende kwake wikiendi hii kumtembelea.”
“Daa! Hapa Feidha nimechangayikiwa sana, yaani hata sijui nini kifanyike ili kumaliza hili soo.”
“Baby, mbona sikuelewi?”
“Kivipi?”

“Kwani si tulisema tutaishi pamoja, sasa unaogopa nini mke kujua? Mimi nimeogopa kwa sababu kumbe tunajuana.”
“Hebu niache kwanza dear, nitakwambia kitu baadaye lakini.

***
Beka alifika nyumbani kwake gizagiza linaingia, akafikia sebuleni ambapo alikutana na laptop kwenye kochi, mkewe akiwa jikoni.Aliisogelea laptop hiyo baada ya kuona picha ya mwanamke juu akiwa katika mapozi. Alipoifikia, ilikuwa picha ya Feidha akiwa amepozi kwenye makochi sebuleni, nyumbani kwake.
“Mh! Hatari,” alisema Beka moyo ukamlipuka lip!

Aisha alitoka jikoni baada ya kusikia mlango unafunguliwa, alipomwona ni mume wake akarudi jikoni huku akimuuliza habari za kazi…
“Poa tu,” Beka aliitika kwa mkato na kuzama chumbani. Moyoni alinuia kufanya jambo la tofauti.
Baada ya kumaliza kupika, Aisha alimwita Beka kula lakini akakataa kwa kigezo kwamba ameshiba.
“Mh! Umekula wapi?”
“Hotelini.”

“Umeanza lini?”
“Siku yoyote ikitokea.”
“Mh! Haya,” alisema Aisha na kutoka chumbani kwenda kula. Chakula hakikupanda kivile! Aliacha!

Alikaa sebuleni akiangalia tivii, mwisho alihisi anapata tabu tu, akaenda chumbani kwa mumewe…
“Beka,” aliita Aisha.
“Nini?” Beka aliitika.
“He! Ndiyo kuitika gani huko?”
“Unataka kuongea na mimi au?” Alihoji Beka.
“Ndiyo.”

“Ongea basi.”
“Nataka kuuliza.”
“Uliza.”
“Feidha au Ummy ndiyo nani?”
“Ni mwanamke wangu nilipanga kumuoa awe mke wa pili maana dini inaniruhusu.”
“Unasemaje Beka?”

“Ina maana hujanisikia au?”
“Kwa hiyo unataka kuoa mke wa pili?”
“Ndiyo maana yake.”
“Kisa nini?”

“Kisa cha kufanya nini?”
“Wewe kuoa mke wa pili?”
“Si unakijua.”
“Sikijui.”

“Nataka mke ambaye hawezi kuamua kuninyima unyumba akiwa anajua mimi ni mume wake. Ndiyo kisa!”
Aisha aliishiwa nguvu kwani ukweli uliobaki ndani ya moyo wake aliujua kwamba, ni kweli amekuwa akimnyima unyumba mume wake na hata katika kikao cha wazazi wake walionesha kukerwa sana na hilo.
“Mimi nadhani badala ya kuoa mke wa pili, niandikie talaka yangu umuoe yeye awe mke wako mmoja ndani ya nyumba,” Aisha alitingisha kiberiti.

“Oke, kama limetoka moyoni mwako nafurahi sana, unaitaka saa hivi?”
“Nini?”
“Hiyo talaka.”
“Hapa haachwi mtu nakwambia Beka.”
“Kwani aliyesema anaacha mtu nani, si umetaka mwenyewe?”
Aisha alitoka, akaenda kukaa sebuleni. Alianza kumtumia meseji za vitisho Feidha…
“Kama lengo lako ni kuniondoa kwenye ndoa yangu, huwezi na utaondoka wewe.”
Meseji ilideliva kwa Feidha, akajibiwa…

“Mimi nadhani ungetengeneza kwako kwanza ndiyo unigeukie mimi. Mwenyewe nimeumia sana kuona nimetembea na mume wa rafiki yangu, ndiyo maana ulipokuja kazini nilikuyeyusha maana pale si sehemu salama kuzungumzia masuala binafsi, lakini sasa niko tayari.”
“Umeanza lini na mume wangu?” aliuliza Aisha.
“Hilo swali hata ukimuuliza yeye atakujibu, si amesharudi uko naye!”
“Kwa hiyo unanijibu utumbo siyo Ummy?”

“Umetaka mwenyewe Aisha. Ungekuwa mpole ukapewa ushirikiano, lakini meseji yako moja umenitumia kali sana. “Mume wako nampenda sana na siwezi kumwacha kwa sababu wewe ni mburula tu.”

Inaendelea 

Chanzo Globalpublishers