Thabit baada ya kukaa kwenye kiti alimkaribisha tena mgeni wake.
“Karibu bibie ukae.”
“Asante,” Nargis alijibu huku akikaa.
Thabit alijikuta akivutiwa na mgeni kwa uzuri wake na jinsi alivyovaa kiheshima na manukato, aliamini kabisa ni mmoja wa wateja wake lakini mwenye uwezo wa juu.
ENDELEA..
“Karibu bibie.”
Kwa vile Nargis alikuwa amejitanda ushungi aliutoa na kumtazama Thabit ili amtambue aliyekaa mbele yake ni nani. Ilikuwa tofauti na mawazo yake macho ya Thabit yalishawekwa upofu na kumfanya amuone mwanamke mrembo lakini asiyemfahamu.
Pia hakupenda hali ile kwa vile mkewe angeingia angeweza kumfikiria vibaya kuwa ana uhusiano na yule mwanamke wakati hamjui na siku ile ndiyo ya kwanza kumuona.
“Samahani bibie hapa ni ofisini halafu aliye mapokezi ni mke wangu, akiingia ndani na kukuta kwenye hali hii unafikiri atanifikiriaje?”
“Thabit,” Nargis alimwita kwa sauti ya upole bila ya kuurudisha mtandio.
“Naam.”
“Mimi ni nani?”
“Kwa kweli nimekusahau, unajua kampuni yangu inatembelewa na wateja wengi.”
“Najua, lakini mimi si mteja kama unavyonifikiria.”
“Kama si mteja wewe nani?”
“Hebu niangalie vizuri.”
Thabit alimuangalia Nargis kama atamkumbuka lakini kumbukumbu hazikumpa kabisa kama yule ni nani. Baada ya kushindwa kumkumbuka alimjibu:
“Mmh! Kwa kweli sikukumbuki kabisa.”
“Hebu rudisha kumbukumbu ya miaka kumi nyuma na siku moja.”
“Huo muda sina hebu nieleze wewe ni nani?”
“Naitwa Nargis.”
“Jina zuri lakini bado sikukumbuki.”
“Thabit unasema kweli au unatania?”
“Mimi na wewe tumeanza kutaniana lini?”
“Thabit mimi ndiye mkeo niliyeondoka miaka kumi iliyopita kwenda kujifungua na kufanikiwa kupata watoto mapacha. Nimerudi leo kwa mume wangu.”
“Mume wako nani?”
“Wewe Thabit.”
“Utakuwa umekosea huenda Thabit mwingine siyo mimi,” Thabit alimruka mkewe kwa vile dawa za mzee Mukti zilikuwa zikifanya kazi.
“Thabit ni wewe mume wangu najua walimwengu tayari wamesha kuroga, ahadi yetu ipo wapi, kwa nini umenisaliti mume wangu?” Nargis alisema huku akilia.
“Dada eeh, naomba uondoke usije nivunjia ndoa yangu bure.”
“Thabit…Thabit…nimechoka kuua kwa ajili yako, hebu nihurumie nimejitoa kwa ajili yako kumbuka matatizo yaliyokutokea lakini nilisimama kuokoa maisha yako na mali zetu.”
“Samahani dada naona umechanganyikiwa, naomba utoke ofisini kwangu,” Thabit hakumuelewa aliona akimchanganya.
“Sitoki mpaka nipate haki yangu nataka kurudi kwa mume wangu na nyumbani kwangu ili tulee wanetu niliokwenda kujifungua nyumbani.”
Thabit aliona kama anapotezewa muda alinyanyua simu ili kumwita mlinzi amtoe nje.
“Wala usisumbuke sipo kwa shari, nitatoka kwa hiyari yangu, ila kesho nitarudi tena, ukitoka hapa kajifikirie.”
“Wala usisumbuke kurudi, mtafute mtu wako siyo mimi.”
Nargis alinyanyuka na kuzunguka meza kisha alimpiga busu Thabit shavuni na kutoka nje bila kuongeza neno. Alitoka hadi mapokezi na kumuaga Subira huku roho ikimuuma na kutamani kummaliza lakini bado alizuia moyo wake kuendelea kuua kwa ajili ya mume wake.
“Mpenzi nakwenda.”
“Ooh! Mara, karibu jamani.”
“Asante, kesho nitakuja.”
“Karibu dada yangu.”
Subira alimsindikiza kwa macho na kutamani kumuuliza gauni lile zuri alilovaa kalishona au kalinunua wapi ili na yeye akanunue, aliamini kwa utajiri wa mume wake angeweza kununua kitu chochote. Lakini kwa vile alisema atarudi kesho yake alipanga kumuuliza au hata kumtuma.
Baada ya Nargis kutoka Thabit alinyanyuka na kutoka mpaka kwa mkewe Subira aliyemkuta bado yupo kwenye mawazo ya kumuwaza mgeni.
“Mpenzi,” alimwita kwa sauti ya chini.
“Abee mume wangu.”
“Kuanzia leo sitaki mgeni mwanamke,” alisema kwa hasira.
“Kwa nini mume wangu?”
“Sipo hapa kutafuta wanawake bali kufanya kazi?”
“Mbona sijakuelewa una maanisha nini?” Subira alishindwa kumuelewa mumewe aliyeonekana uso umejaa hasira.
“Yule mwanamke aliyekuja amekuja kutangaza mapenzi eti ananipenda wakati anajua kabisa mimi ni mume wa mtu.”
“Mmh! Kwa hiyo umemuambia nini?”
“Ameondoka baada ya kumtisha kumuitia polisi.”
“Mmh! Sawa nimekuelewa mume wangu, nashukuru kwa uaminifu wako angekuwa mwanaume mwingine kwa uzuri wa yule mwanamke angemkubali tu na kunisaliti.”
“Mpaka nakuoa niliamua kuachana na mambo yote mabaya.”
“Asante mume wangu.”
Lakini wakati Thabit anageuka ili aingie ofisini Subira alishtuka kuona love bite (alama ya midomo iliyobaki baada ya mtu kumbusu mtu akiwa na rangi ya mdomo) zilikuwa nyingi kwenye shati jeupe la mpenzi wake. Alijikuta akishtuka na mapigo ya moyo kwenda mbio na kuamini mumewe alikwenda kujihami lakini yule ni mpenzi wake.
“Thabit,” alimwita kwa sauti kama ya mtu mwenye pumu.
“Naam mke wangu,” Thabit aliyekuwa ameshika mlango wa ofisi ili afungue aligeuka kumsikiliza mke wake.
Itaendelea wiki ijayo.
Alipogeuka hali ilikuwa ile ile ‘love bite’ zilikuwa kifuani na kwenye mashavu na mdomoni. Subira alizidi kuchanganyikiwa na hali ile na kuona jinsi Thabit asivyo muaminifu na alitoka ili kumhadaa lakini ndani kulikuwa na matendo ya mapenzi.
“Mume wangu!”
“Naam.”
“Unanifanyia nini?”
“Kivipi?”
“Yaani unanigeuza mtoto mdogo kwa nini?” Subira aliuliza huku akilia kitu kilichomshangaza Thabit na kutaka kujua kulikoni.
“Mke wangu umekuwaje leo?”
“Siyo nimekuwaje, ila unaonesha jinsi gani ulivyo muongo tena si muaminifu.”
“Mbona sikuelewi una nini mke wangu?” Thabit alizidi kumshangaa mkewe na lawama zake.
“Unanidanganya eti umemfukuza kama mbwa kumbe ndani mlikuwa na matendo ya kimahaba.”
“Mimi Thabit?”
“Ndiyo, hata kama kusoma sijui basi picha nimeiona.”
“Kwa nini unasema hivyo?”
“Hebu angalia kifuani mwako.”
Thabit alijitazama na kukuta kuna love bite na kushtuka.
‘Ha!”
“Unashtuka nini? Eti nilimfukuza kumbe mpenzi wako Mungu kakueleleza,” Subira alisema kwa hasira huku amemshikia pua.
“Hii ni ajabu vitu hivi vimetoka wapi, nakuapia mke wangu hakunibusu kwenye nguo alinibusu shavu kwa nguvu na kutoka baada ya kumkatalia mambo aliyokuja nayo ya kimahaba,” Thabit alijitetea.
“Siwezi kukuamini naona unipendi na kumwita yule mwanamke mzuri ili kunionesha.”
“Sijamwita hata hizi love bite nashangaa kuziona.”
“Si mbele tu angaliana na nyuma.”
Kauli ile limfanya Thabiti kuvua shati ili aangalia, hali ilikuwa vilevile alama ya midomo ilikuwa kingi kwenye shati jeupe na kumfanya Thabit abakiwa akiduwaa na kujishangaa alama zile zimetoka wapi.
No comments:
Post a Comment