UKAWA ni mfano mbaya

NINAPOSIKILIZA Bunge la Katiba naona wazi kabisa kuwa kuna upungufu. Kutokuwepo kwa wajumbe wa kutoka kundi la UKAWA linaloundwa na wajumbe waliotokana na vyama vya CUF, CHADEMA na NCCR kumepunguza kwa kiasi kikubwa ubora wa mjadala bungeni.

Kutoka katika kundi la UKAWA kuna wanasiasa werevu na wasomi mahiri. Miongoni mwao yupo mchumi Profesa Ibrahim Lipumba. Wapo wengine wengi kama mwanasheria Tundu Lissu, John Mnyika, Joseph Mbilinyi, James Mbatia, Habib Mnyaa na wengine wengi ambao wamethibitika kuwa na uwezo mkubwa wa kujenga hoja na kushawishi.

Uwepo na ushiriki wa UKAWA bungeni, naamini ungeboresha sana Katiba itakayopendekezwa na nikiwa Mtanzania mzalendo nasikitika sana kutokuwepo kwao. Masikitiko yangu ya kutokuwepo kwa UKAWA yanatokana na ukweli kuwa kimtazamo nakubaliana na mengi ambayo UKAWA wanayasimamia – ikiwemo serikali tatu.

Baada ya UKAWA kususia, jitihada kubwa zilifanyika za kuwasihi warudi bungeni. UKAWA walikataa kata kata kusikiliza la mwazini wala mnadi sala. Jitihada za mashauriano yenye lengo la kupata maridhiano pia zilishindikana mpaka mkutano wa juzi wa Rais Jakaya Kikwete ambaye pia ni Mwenyekiti wa Chama cha Mapinduzi na Kituo cha Demokrasia Tanzania (TCD) ambacho wajumbe wake ni vyama vyenye wabunge.

Kwa mujibu wa Mwenyekiti wa TCD, John Cheyo, katika mkutano huo walikubaliana mchakato wa kuandika Katiba mpya uahirishwe kwa sababu hakuna muda wa kutosha kumalizia mchakato huu kabla ya Uchaguzi Mkuu ujao na badala yake Katiba ya sasa ifanyiwe marekebisho katika vipengele kadhaa hususan vile vinavyohusu uchaguzi.

Hata hivyo, baada ya tamko la Cheyo kwa vyombo vya habari, tafsiri tofauti zilitolewa juu ya makubaliano hayo. Wakati Cheyo akisema kuahirisha Bunge ni baada ya kipindi cha Bunge la Katiba cha sasa kuisha, wajumbe wa UKAWA walidai maana ya uamuzi huo ni kuwa Bunge liahirishwe mara moja.

Kwa upande wake, Cheyo alisema Bunge la Katiba linaloendelea litapiga kura na kupitisha Katiba inayopendekezwa na baada ya uchaguzi wa mwakani kura ya maoni itafuata, wakati UKAWA wao wanataka baada ya uchaguzi ujao mchakato uanze upya, ingawa kuna ya tofauti ya mawazo juu hatua ya kuanzia.

Wakati Cheyo ametaja kukosekana kwa muda wa kutosha kuwa sababu ya uamuzi wa kuahirisha Bunge, ukizingatia kuwa kuna uchaguzi unakuja; baadhi ya watu wamekuwa wakitaja kujiondoa kwa UKAWA na kukosekana kwa muafaka kuwa ndio sababu ya uamuzi wa kuahirisha mchakato.

UKAWA wanamlaumu Samuel Sitta, Mwenyekiti wa Bunge la Katiba kwa kutoahirisha Bunge. Baadhi ya matamko ya UKAWA yanalenga kuonyesha kuwa Rais Kikwete anataka Bunge lisimame sasa, ila kikwazo ni Sitta! Lakini jambo la kushangaza ni kuwa, kama Rais Kikwete anataka Bunge liahirishwe sasa, kwa nini asimuandikie Sitta kumtaka afanye hivyo?

Mhariri wa moja ya magazeti nchini ambaye pia ni mwanasheria akizungumza katika mahojiano ya kipindi kimoja cha runinga alisema kitendo cha Sitta kutoahirisha Bunge ni dharau kwa Rais ambaye ni bosi wake. Aliongeza Mhariri huyo kuwa Sitta baada ya kusikia tamko katika vyombo vya habari angempigia simu bosi wake aombe maelekezo na ufafanuzi.

Wakati Sitta akilaumiwa, ikumbukwe pia Mwenyekiti wa TCD ambaye ndiye aliyetoa tamko na ufafanuzi baada ya vikao, naye ni mjumbe wa Bunge Maalum la Katiba. Hata hivyo, Cheyo halaumiwi mno kama Sitta.

Jambo lililo wazi katika kipindi hiki ni kuwa wengi tumekuwa wanaharakati na katika harakati mara nyingi tunachagua hoja zinazotupendeza na kupuuza hoja kinzani. Kutokana na joho la uanaharakati, sheria na mantiki vimetupiliwa mbali na badala yake hoja za nguvu zimetawala.

Sasa UKAWA wameitisha maandamano ili kushinikiza Bunge liahirishwe kabla ya Oktoba 4, mwaka huu, kwa sababu ni ubadhirifu wa fedha za umma. Zoezi hilo linatajwa kuwa ni ubadhirifu wa fedha kwa sababu UKAWA walisusia. Wanaharakati, wasomi, waandishi wa habari, viongozi wa dini na hata baadhi ya wajumbe wa iliyokuwa Tume ya Mabadiliko ya Katiba, nao wamejiunga katika harakati za kutaka Bunge lisitishwe.

Wakosoaji wanaona kutokuwepo kwa UKAWA kunafuta uhalali wa utendaji wa Bunge la Katiba kwa sababu Katiba itakayopatikana itakuwa haikutokana na muafaka. Mmoja wa wasomi na wanaharakati maarufu, Profesa Kitila Mkumbo alikiambia kituo kimoja cha runinga hivi karibuni katika mahojiano kuwa atafanya kampeni ya kuipinga Katiba itakayopendekezwa kwa sababu tu haikutokana na muafaka wa kitaifa. Kitila anasema msimamo wake wa kuipinga Katiba haujalishi yaliyomo: yawe mazuri au mabaya.

Lakini wakati jitihada za kuzuia kuendelea kwa mchakato wa kuandika Katiba zikipamba moto, maswali mawili ya msingi juu ya kitendo cha UKAWA cha kususia yamepuuzwa. Maswali haya ni kwanza; kwa nini UKAWA walijiondoa bungeni na pili kususia kwao Bunge la Katiba ni halali?

Hofu yangu ni kuwa kwa kupuuza maswali haya tutakuwa tunaangalia tulipoangukia badala ya pale tulipojikwaa. Isije kuwa UKAWA walifanya kosa na sasa wanahangaika kutafuta wachawi. Isije kuwa waliofuja fedha ni UKAWA ambao kwa kujitoa ni kama wamehujumu mchakato na kusababisha thamani halisi tuliyolipia tusiipate.

Hofu yangu kubwa zaidi ni kuwa kwa kuunga mkono UKAWA tusije kuwa tunaidhinisha kususa kama silaha ya kisiasa na kuweka mfano mbaya kwa siku za baadaye.

Chanzo RaiaMwema