HADITHI: Nilioa jini nikamsaliti -19

Kutokana na kutoa ahadi kwa mzee Mukti Buguju kama akiolewa atampa zawadi kubwa, alimnunulia gari la kifahari la kutembelea na kumjengea nyumba kubwa pamoja na fedha taslimu milioni kumi. Alimuahidi kuendelea kumpa vitu vingi kwa vile alimfikisha alipopaota na kuona muujiza kufika pale.                                

Siku nazo zilikatika huku muda wa Nargis kurudi kwa mumewe ukikaribia, ilikuwa miaka ikawa mwaka ukawa mwezi na hatimaye siku. Nargis akiwa na wanawe wenye umri wa miaka kumi kila mmoja. Alikwenda kwa wazazi wake na kuwaeleza wiki ile alikuwa anarudi kwa mume wake Thabit baba wawili Zumza (Kurwa) na Zamzu (Doto).

“We Nargis una kichaa, utawezaje kurudi kwa mumeo ikiwa umeambiwa wanadamu wamekuwahi?”
“Mama mwanadamu na jini nani zaidi?”

“Jini, lakini mwanadamu yupo kama kinyonga hivyo anaweza kukuharibia maisha yako.”
“Mama kwa vile sasa nina uhuru wa kwenda popote, niacheni mwenyewe nakuhakikishia kama haitarudi maiti yangu hapa basi nitarudi na mume wangu.”

“Mmh! Mtoto wewe mbishi sana, we nenda yatakayokukuta usitushirikishe.”
“Hilo nalijua ila nilitaka kuwajulisha kuwa natoka kama nikifa nitunzieni wanangu.”
“Sawa.”

Nargis alirudi chumbani kwake kuwaaga wanawe, aliwakusanya kisha aliwaeleza:
“Wanangu, leo ninawaacha nakwenda kumtafuta baba yenu.”

“Mama unakwenda kumtafuta wapi wakati ulitueleza tutaondoka wote kwenda kwa baba?”
“Walimwengu wamenizidi akili lazima nitatumia uwezo wangu wote kumrudisha baba yenu mikononi mwangu la sivyo mtakuwa watoto wasio na baba.”

“Kwa nini tusiende wote?” Zamzu alimwambia mama yake. 
“Hapana wanangu ninyi pumzikeni kazi hii nitaifanya bila tatizo.
“Mama mimi nina hamu ya baba naomba nikamuone tu kisha nirudi,” Zumza (Kurwa) naye alimwambia mama yake.

“Hapana wanangu nitamleta huku.”
“Mama mbona hatukuelewi mara unaenda kumtafuta umlete huku wakati ulituambia muda umebakia mdogo twende kwetu huku siyo kwetu sasa unakwenda kumleta baba aje afanye nini?”
“Zumza na Zamzu wanangu majibu yenu yote nitawajibu nikirudi.”

“Haya mama safari njema msalimie baba.”
Nargis baada ya kuagana na watoto wake alitoka rasmi kwenda duniani kumfuatilia mumewe. 
Akiwa katika umbile la kibinadamu, jini Nargis alitokea duniani baada ya muda wake wa kukaa chini ya bahari kwisha.

Kabla ya kuondoka eneo la Salenda alitembeza macho kuiangalia dunia aliyoikosa kwa muda mrefu. Moyoni alijiapia hatarudi chini ya bahari mpaka amempata mumewe au arudi yeye akiwa maiti.

Baada ya kiapo chake aliachana na bahari na kutembea taratibu hadi karibu ya barabara na kujishika katika paji la uso baada ya muda mfupi alikuwa mbele ya ofisi ya Thabit ambayo ilikuwa imepanuka na kuwa ya kisasa zaidi.

Akiwa katika umbile la kibinadamu alitembea hadi akaingia ndani. Alifika mapokezi ambako ndipo alipokuwa mbaya wake Subira aliyemchukulia mumewe. Japokuwa moyo ulimuuma lakini alijikaza na kuficha hasira zake kwa vile hakurudi duniani kwa shari bali kuitafuta suluhu ya kumpata mumewe bila kumwaga damu.

“Asalaam aleykumu?” Nargis alimsalimia Subira aliyekuwa bize na kazi.
“Waleykum salaam,”  Subira aliitikia huku akinyanyua uso kumwangalia aliyemsalimia mwenye sauti nzuri huku pua zake zikilakiwa na harufu nzuri ya manukato. Alishtuka kumuona mwanamke mzuri amesimama mbele yake.

“Karibu dada,” alimkaribisha bila kumjua ni nani. 
“Asante.”
“Nikusaidie nini dada yangu?”
“Bwana Thabit yupo?”

“Mmh! Yupo, unaweza kukaa hapo ana wageni.”
“Inshaallah.”
Nargis alikaa kwenye kochi na kutulia kusubiri kuingia ofisi ya mumewe ambaye wakati huo alikuwa amemuoa Subira. Subira pamoja na kuendelea na kazi alimtazama kwa wizi mwanamke huyo mrembo aliyekuwa amekaa kwenye sofa akitembeza macho kuiangalia jinsi ofisi ilivyopendeza.

Baada ya nusu saa alitoka mtu aliyekuwa akizungumza na Thabit, kabla Subira hajanyanyua simu amweleze kuna mgeni, Thabit alitoka.
“Vipi kuna mgeni?”

Aliuliza baada ya kumuona Nargis aliyekuwa ametulia kwenye kochi.
“Ndiyo sweet.”

“Karibu,” Thabit alimgeukia Nargis na kumkaribisha.
“Asante,” Nargis alijibu huku akinyanyuka.

Thabit alitangulia mbele kuingia ofisini huku akifuatwa nyuma na Nargis, Subira alijikuta akivutiwa na mshono wa gauni alilovaa mgeni huyo. Thabit baada ya kukaa kwenye kiti alimkaribisha tena mgeni wake.
“Karibu bibie ukae.”

“Asante,” Nargis alijibu huku akikaa.
Thabit alijikuta akivutiwa na mgeni kwa uzuri wake na jinsi alivyovaa kiheshima na manukato, aliamini kabisa ni mmoja wa wateja wake lakini mwenye uwezo wa juu.

Inaendelea 

Chanzo globalpublishers