MUHONGO ASISITIZA TATIZO LA UMEME NCHINI LITAKOMA.....

WAZIRI wa Nishati na Madini, Profesa Sospeter Muhungo amesema tatizo la umeme nchini lazima litoweke. Muhungo alitoa taarifa hiyo mjini Dodoma jana, wakati wa kutiliana saini mkataba wa ujenzi wa mtambo wa kuzalisha umeme kwa kutumia gesi asilia wa Kinyerezi IV, Dar es Salaam. Mradi huo unatekelezwa kwa ubia kati ya Serikali na Kampuni mbili kutoka China za Golden Concord Ltd na China-Africa Investment.

Profesa Muhungo alisema Serikali bado inasisitiza kwamba tatizo la upungufu wa umeme lazima liiishe ndiyo maana inafanya jitihada mbalimbali za kuongeza uzalishaji wa umeme.

“Mradi wa Kinyerezi IV utazalisha umeme Megawati 330 na utagharimu Dola za Marekani milioni 350.

“Mradi wa Kinyerezi IV ni mradi wa nne wa kuzalisha umme ukitanguliwa na Kinyerezi I utakaozalisha Megawati 150, Kinyerezi II Megawati 240 na Kinyerezi III ambao kwa kuanzia utazalisha Megawati 300,” alisema Profesa Muhongo.

Alisema mradi huo wa Kinyerezi IV pia utazalisha umeme kwa kutumia nguvu ya gesi asilia na kwamba ujenzi wa bomba la kusafirisha gesi kutoka Mtwara unatarajiwa kukamilika mwishoni mwa mwaka kesho.

Naye Kaimu Mkurugenzi wa Shirika la Umeme Tanzania (TANESCO), Felchesmi Mramba alisema kipindi cha watanzania kukaa bila umeme kimekwisha.

Chanzo:- Mtanzania