MBOWE, LIPUMBA NA MBATIA KUUNGURUMA MBEYA.

WENYEVITI wa vyama vitatu vya CHADEMA, CUF na NCCR-Mageuzi wanatarajia kuunguruma katika mkutano wa hadhara utakaofanyika Oktoba 10,  ukitanguliwa na maandamano jijini Mbeya katika viwanja vya Shule ya Msingi Ruanda Nzovwe.

Mkutano huo ni mwendelezo wa mikutano kama hiyo iliyofanyika jijini Dar es Salaam na visiwani Zanzibar kwa ajili ya kumshinikiza Rais Jakaya Kikwete asiusaini muswada wa sheria ya mabadiliko ya Katiba uliopitishwa na Bunge hivi karibuni ukilenga kukibebe Chama cha Mapinduzi (CCM).

Taarifa iliyotolewa jana na Mwenyekiti wa CHADEMA mkoa wa Mbeya, John Mwambigija, ilisema kuwa maandalizi ya mkutano huo yameanza, huku akiwataka wananchi kujitokeza kuwasikiliza viongozi hao, Freeman Mbowe (CHADEMA), Prof. Ibrahim Lipumba (CUF) na James Mbatia (NCCR-Mageuzi).

Alisema tayari wameshaliandikia barua Jeshi la Polisi kwa ajili ya kuomba kibali cha kufanya mkutano na maandamano yatakayoanzia nyuma ya viwanja vya Chuo cha Uhasibu (TIA) kupitia Mwanjelwa karibu na uwanja wa ndege wa zamani hadi viwanja wa Shule ya Msingi Ruanda Nzovwe.

Naye Katibu wa CHADEMA Wilaya ya Mbeya mjini, Christopher Mwamasiku, alisema hatua na taratibu zote zimekamilika na kwamba wanasubiri mrejesho kutoka polisi kuhusu barua yao yenye Kumb.CDM/MBM/KUW/10/2013/27 ya Oktoba 3 mwaka huu.

Chanzo:- Tanzania daima.